Foi unha campaña de achegamento á lectura na que se traballou o conto como unha achega á interculturalidade e á creación artística para desenvolver o espírito crítico n@s nen@s e ofrecer os medios para aprender novas formas de mirar.

A través da actividade CONTOQONTIGO, realizada por OQO Editora, máis de 600 nen@s de 15 concellos de Lugo participaron nunha experiencia moi especial: unha viaxe polo continente africano da man do álbum CHOCOLATA. Nesta historia, creada pola autora sarriana Marisa Núñez (galardoada co Premio Internacional ESPACE ENFANTS 2007), unha hipopótama decide saír da súa lagoa e vivir novas experiencias na cidade, nunha viaxe na que aprenderá a valorar o seu contorno.

CONTOQONTIGO desenvolveuse nunha carpa iglú que se instalaba nos centros escolares. Alí, Raquel Méndez e Eva Vila desenvolven unha innovadora actividade na que os nenos participan dunha maneira interactiva na historia: proban o doce máxico que lles fai entrar no conto, xogan coas imaxes a reinventar a historia e póñenlle a banda sonora á narración. Esta experiencia creativa permítelles aos formadores traballar coa lectura dun xeito lúdico.

As sesións tiñan unha duración de 50 minutos e estaban destinadas a nen@s de 1º e 2º ciclo de Educación Primaria cun máximo 15 participantes por sesión. A Área de Cultura da Deputación dotou a todos os centros participantes cun lote de libros co obxectivo de traballar o álbum ilustrado antes e despois do desenvolvemento da campaña.