O vicepresidente da Deputación, o nacionalista Antón Bao, presentou hoxe o programa de actividades de verán “Cultura Aberta nos concellos”, que se desenvolverá entre xullo e setembro pola práctica totalidade dos concellos lucenses, levando actividades culturais variadas, de calidade, gratuítas e para todos os públicos.

Coa programación deste circuíto, que engloba tres actividades diferentes, a Área de Cultura da Deputación pretende, segundo sinalou Bao, “facer que a Deputación funcione como elemento vertebrador e fornecedor dos concellos tamén no eido cultural”. O vicepresidente da Deputación fixo fincapé en que “grazas ao apoio e traballo da Área de Cultura da Deputación faise posíbel que actividades culturais de calidade cheguen a concellos que por razóns xeográficas ou socioeconómicas permanecerían á marxe deste tipo de programación cultural”. Este propósito de “democratización da cultura” define, segundo Antón Bao, un dos eixos e piares de traballo da Área de Cultura da Deputación. Unha liña de actuación que posibilita, tal como explica o vicepresidente da Deputación, que “case a totalidade dos concellos da provincia de Lugo reciban actividades culturais de calidade sufragadas pola Deputación, dado que a todos aqueles concellos que o solicitaron lles foi concedida unha actividade”.

O vicepresidente da Deputación, Antón Bao, entrou a explicar en que consisten cada unha das tres actividades que engloba o proxecto “Cultura Aberta nos concellos”. Deste xeito, haberá proxeccións de cine para os máis pequenos a bordo dunha caravana itinerante, chamada “A caixiña dos mistos”. O feito de ser un espazo pechado posibilita, segundo Bao, “que as proxeccións se poidan levar a cabo sen ter en conta as inclemencias meteorolóxicas, para evitar que, tal como aconteceu o ano pasado, varias das proxeccións de cinema en exteriores que programara a Área de Cultura da Deputación se visen deslucidas polo mal tempo”. Así asegúrase o éxito ao achegar a cultura cinematográfica e audiovisual aos nenos e nenas lucenses. Esta actividade itinerará por 30 concellos lucenses durante os meses de xullo e agosto.

Outra das actividades que se levará a cabo, e que tal como indicou Bao se estreou cun éxito rotundo nos xardíns da Deputación diante de preto de 200 nenos, nenas, pais e nais, é o espectáculo de humor, malabares e habilidade que representa a personaxe imaxinaria Peter Punk, ser evanescente que habita o mundo de Nunca Máis. 30 concellos lucenses terán a oportunidade de gozar co esperpéntico show de clown e malabares que propón Peter Punk.

Doutra banda, Maxia nas Comarcas aspira a converterse na actividade máis espectacular do verán alá polos concellos lucenses polos que pase. Os mellores magos galegos xuntaranse para espertar a ilusión entre públicos de todas as idades, nun espectáculo co éxito asegurado nas nove funcións que haberá noutros tantos concellos lucenses.