O vicepresidente da Deputación de Lugo, o nacionalista Antón Bao, asumirá o vindeiro martes 9 de febreiro, trala xuntanza do padroado da UNED, a presidencia deste padroado conformado por 12 membros, encargado da xestión da institución académica en Lugo. Deste xeito, o vicepresidente da Deputación, Antón Bao, converterase a todos os efectos no presidente da UNED en Lugo, que agrupa tamén ás aulas de Viveiro, Foz e Monforte de Lemos.

A presidencia do padroado foi ostentada, dende a creación do centro asociado, pola persoa do alcalde da cidade. Quedou establecido, polo propio padrodado, que a presidencia alternarase cada dous anos entre responsables do goberno municipal e do goberno provincial. Antón Bao asume o cargo por detentar, como vicepresidente da Deputación e responsábel das áreas de Cultura, Ensino e Normalización Lingüística da mesma, a representación do organismo provincial no nomeado padroado universitario desde o momento da súa conformación, xa que, hai que lembrar, a Deputación foi, dos organismos fundadores, a entidade que máis diñeiro aportou no momento de constitución da aula da UNED en Lugo.

A Deputación, a través da vicepresidencia primeira, destina anualmente unha axuda de 270.400 euros para o mantemento do centro asociado de Lugo e das aulas de Viveiro, Foz e Monforte de Lemos. O organismo provincial pulou con forza, dende a chegada ao goberno de socialistas e nacionalistas, para que Lugo puidese contar cun centro asociado da UNED. Hoxe en día máis de 1.500 lucenses poden realizar estudos a distancia de grados universitarios co apoio dos profesores do centro asociado da UNED en Lugo.

Na xuntanza do padroado do vindeiro martes trataranse, ademais, outros asuntos como a aprobación do exercicio económico do 2009 e do orzamento para o ano 2010. Entre os puntos da orde do día figura, tamén, a aprobación, se procede, do plan de acceso integral aos contidos dixitais da UNED e da programación de Cursos de Verán do Centro de Lugo.